MID KA MID AH MASAFOOYINKII SH. AXMED ‘GABYOW’

ALLAH ha u naxariistee, Sh. Axmed 'Gabyow' wuxuu ku dhashay Degmada Cadale 1844 isla Cadale ayuuna ku geeriyooday 1934 .

Wuxuu caan ku ahaa tirinta Masafada isagaoo dadka ku wacdin jiray. Sida aan ka xigtay Xuseen Sh. Axmed ‘Kaddare’, Sh. Gabyow wuxuu gaaray heer uu aayad kasta oo Qur’aanka ka mid ah tafsiirkeeda ku gudbiyo tix masafo ah. Dadka qaar waxayba Sheekha ugu yeeraan Sh. Axmed ‘Wacdiyow’.

Wacdiga keliya kuma ekayn ha yeeshee wuxuu sidoo kale qayb weyn ka qaatay halgankii looga horjeeday gumaystayaashii isaga oo maasadiisa adeegsanaya ayuuna ummadda ku wacyi gelin jiray inay ka hortagaan.

Waxaa la wariyay in Sh. Axmed ‘Gabyow’ uu maalin soo maray dhallinyaro caways tumanaysa ka dibna isaga oo barbaartaa wacdinaya ayuu u mariyay masafada soo socota.

----

Shaharki Soon iyo shaatadii dago

Haddii la sheelay shanti salaadood

Shiitkiyoon sharcigeennu sheegayn

Shabashabo shuqulkooda haysiin

Iminki shuushku idiin yimaadoo

Sheeggu dhummoo shuqo laysku soo tolo

Labada shuulana laysku soo shiro

Shanshooyinkiinnana laysku shiil jaro

Sharqi xaggiis shacrigiin la aaddiyo

Shillal ka hoos shacshac laysku shaaqalo

Shaydaankinow qabrigiin ku soo shiro

Oo shiddo dhacdaa la shallaayi doonaa

Sheeggaygase shaqshaqaad ka yeesheen!

-----

RABBI  Sheekh Axmed ha ugu deeqo Jannatul-Firdosa Al-aclaa.....Aamiin

FAA'IIDADA AQRINTA QUR'AANKA KARIIMKA AH

Noloshayda qoraallo ay dad kala duwani leeyihiin oo badan ayaan aqriyay; buugaag kala luqad ah, maqaallo kala dan ah, sheekooyin ku saabsan mowduucyo kala fog-fog ,..... imw balse weli ma arag mid anfac ku gaara aayad Qur'aan ah ama hal Xadiis. Aqoon baa kuu kororta, Niyaddaa ku degta, Oogada (jirka) iyo uurka (ruuxa) ayaa ku bogsada oo dawo ayay aqrinta Qur'aanku u tahay Stress, wel-wel, degganaansho la'aan iwm adigu ba tijaabi.

Intaa oo dhan waxaa sii dheer oo ka sii qiimo badan ajar aan la koobi karin oo kayd aakhiro kuu ah.

Ogow halki xaraf oo keli ah (Ma aha kalmad ee waa xaraf) ee Qur'aan ah oo aad aqrisaa ugu yaraan 10 ajar ayaad ku helaysaa.

Aan ku dadaallo inaan maalin kasta Qur'aanka ka aqrinno hadba inta aan karno, muhimaddu waa joogtaynta.

Qasab ma aha inaad Qur'aanka gebigii ama qayb badan oo ka mid ah xafidsan tahay ee inta aad taqaan aqriskooda ku celceli ku na dadaal inaad barashadiis sii kordhisato.

DHALLINYAHAY KA QIIROODA

Qayrkaa wuxuu yeelo
Waad qaban karaysaaye
Quustiyo ilmada jooji

Adoo qaba lixdiyo maanka
Qab-jab iyo waxaa ceeb ah
Qof kaleeto saarrow e
Dhallinyahay ka qiirooda

Quuradiyo ka toos jiifka
Ku dhaqaaq qorshaha kaa ah
Dabeed Qaadir talo saaro
-----
Indhageelle 20170329

 

WAA DUNI YA XAALKEED

Ceebta aad ka durugtaa
Duul kale ku baanaa

Nin meeshuu ku daaloba
Nin kalaa u diimoon

Dab munaafiq shiday bay
Daacadi ku gubataa

Doog baxay gugii bay
Dayrtuba ku faantaa

Waa duni ya xaalkeed!

----

Indhageelle 20170401