Ururradii ama jabhadihii
dalkeenna ka curtay siddeetameeyadii qarnigii hore waxay ummadda ugu soo
marmarsiyoodeen inay ka tuurayaa heeryadii Kacaanka ayna u horseedi doonaan
nolol iyo maamul ka wanaagsan kii towriga ahaa.
Inay ka raayaan ha joogtee, way
ka dareen oo dhibo aan la koobi karin ayay shacabkii u gaysteen, bur bur qax,
dagaallo qabyaaladaysan iyo waxyaabo kale oo way habaarsadeen.
Maansadan HAGARDAAMO oo aan
tiriyay 09/05/1996 arrintan ayay ku saabsan tahay.
Haybaddeeni lumiyee
Ku adeegta haybtee
Hebelladu wataanow
HALOW may maqlaysaan
Hal abuurka gabaygiyo
Howraarta maansiyo
Halka laydin leeyahay
Hoos miyaad u dhugataan
Ururrada halaaggow
Waxba yaanad hogadiyo
Hanfidiyo kulaylkii
Har qabow ya raaxiyo
Hoos noogu dourine
Waxba yaanad heerkiyo
Halkii aan sugayniyo
Hammigeenni gaarine
Waxba yaanad hiil iyo
Hoo nagu gar gaarine
Waxba yaanad hoog iyo
Halis naga bad baadine
Waxba yaanad hebed iyo
Hayin noo ahaannine
Ummaddo hanqaarrayd
Waxba yaanad hogob iyo
Howd caleen leh gaynine
Holac iyo kulayl iyo
Hongorriyo war yaydnaan
Hafeef naga baxnaanine
Haddaynaan halaaggiyo
Noo horseedin baaba’a
Hilibkeenna cayriin
Aydnaan u warin haad
Haddaydnaan isma hurtada
Hayb hayb isugu layn
Haddaynaan kun haaddiyo
Kun ka daba hablaysoo
Haybaarinaysiyo
Xayn kaloo habowdoo
Ka huleeshay Diintiyo
Hiddihii wacnaa iyo
Hablo laysu guurshiyo
Hub-qaad wiil ahoo gaal
Ardaa kula hoyaadoo
Haweenaysanaayiyo
Horin maanyo qaaddoo
Ku halaagmay gebi iyo
Howdka qaar ku lumay iyo
Hal lawaayay naga dhigin
Haddaynaan halyeeyiyo
Gebi howlkarradi iyo
Hooyiyo sibyaantiyo
Hudqaylladi innaga marin
Hayinkii la dhaanshee
Cunay heeryadiisiyo
Aydnaan noqon halkii gabe
Haddaynaan huf iyo been
Iyo hees walwaaleed
Huuhaa innnagu sabin
Haddaydnaan na badin halis
Haddaynaan dab nagu hurin
Haddaydnaan huf naga dhigin
Haddaydnaan hog nagu ridin
Haddaydnaan hul nala gelin
Haddaynaan hankeenniyo
Dilin haybaddeennii
Idin maaban hiifeen
Maansadan ha’layda ah
Habeennimo ma tiriyeen
Haaraamid iyo liid
Idinmaan hibeeyeen
Bulshaduna dul iyo hoos
Idin may habaarteen
Hoy hoy waryaadaha
Ummad waxad halaagteen
Hanti waxad bur buriseen
Howzer waxad ridayseen
Halgan waxad ku daasheen
Halkee baad ku gaarteen
Hubka laba dhacleeyiyo
Hoobiyihiyo taangiga
Heedhe yaad u sidataan
Halgankaan dhammaanine
Had ya goor la sheegiyo
Hididiilladiinnani
Halkee bay ku idishahay
Hadafkiinnu waa maxay
Kollay haanti marataye
Ma inaad haruubkana
Hambashada ku dhiman iyo
Hoorkaba liqdaan baa
Aabbihii halaaggiyo
Halyaygii kacaankiyo
Ma inaad habaar qabe
Halkiisii gashaan oo
Ninba haybta tiisa ah
Halka ugu sarraysiyo
Hoosta ugu dambaysee
Gebi howsha qarankaba
Laga hago ku ururshaa
Heerkay maanta joogtiyo
Siday haatan tahay iyo
Ma inaad halkeennaa
Nagu haysataan baa
Hayhaata weeyaan
Hammigiinni waa ba’ay
Maalintay habboonayd
Dadku heellanaayeen
Halhayskiinna been iyo
Halki aad tiraahdaan
Halhaleel ayidayeen
Hoostiinna joogeen
Xoog iyo hantiyo maal
Iyagoon hagranahayn
Idiin wada huraayeen
Adinkaa hareer maray
Hilinkii wacnaa oo
Hasha caanaheedii
Heshiis maali waayaye
Haatanoo kor iyo hoos
Hagardaammadiinniyo
Booraanti hadimiyo
Hoddii lagu baraarugay
Haldhaa waxad masloon tiin
Habeen uu u dumayoo
Gudcur uu hareeyoo
Hareer uu u leexdiyo
Garan waayay hilinkii
Ama ruux hir qaadoo
Ku harqaday bad wayntoon
Holi karin dabaal oo
Xunbo gacan u haadiyay
Intaan hadallo soo iri
Halla kama jiraan iyo
Huuhaa iyo haddii aad
Hanjabaadya bootiyo
Mooddeen huf iyo been
Had dhow waxannu dhowrraa
Sida ayga haramkoo
Harka maalinnimadii
Soo maray haloosiye
Haweenkiyo carruurtii
Hareer kala mareen ooy
Hanqar kaga dhigeen dhagax
Hooshna ay ku qaadeen
Adinkoo habkaasoo
La hal maala kalabkaa
Intay hadi haddeer tahay
Haajiroo innaga taga
U hayaama meel kale
Hortiinnana shar iyo baas
Hoog iyo mixniyo belo!!
Waxaa Tiriyay:
Muqdisho - 09/05/1996